PAR Impar

PAR Impar

inter ludorum puerilium genera, memoratur Horatio, Sermon. l. 2. Sat. 3. v. 247.

Aedificare casas, plostello adiungere mures,

Ludere par impar, equitare in arundine longa,

Si quem delectat barbatum, amentia verset.

Imo et Principes viros hôc genere ludi delectatos, discas ex Suetonio, apud quem, scribit ad filiam Augustus, Misi tibi denarios ducentos quinquaginta, quos singulis convivis dederam, si vellent interse, inter cenam, vel talis, vel par impar ludere, c. 71. Ubi tali ab eo separantur, non quin et talis par impar luderetur: nam ἀρτιασμοῦ per talos exemplum habes in Lyside Platonis, et notat

Pollux l. 9. Sed quia et tesseris, et nummis, et nucibus, idem fiebat, ut apud Ovidium et Aristophanis Scholiastem, legere est. Similis lusio erat, quando quaerebant, capita aut navem, Macrob. Saturn. l. 1. c. 7. Sic apud Graecos ζυγὰ, ἢ ἄξυγα, de quo vide Scholia Aristophanis ad Plutum. Nec absimile, micare digitis, quum horum partim plurium, partim pauciorum extensione, vel contractione divinatur, quid bonae quidve malae sortis ceciderit. Vide Chabotium ad loc. At Muhammedanos per Par impar etiam iurare consuevisse diximus supra.